Rematou 2014, propuxéstesvos darlle menos ao dente, comer san, ir ao ximnasio, facer exercicio, saír a correr, baixar de peso… pero pasan os meses, e eses polvoróns, eses manteigados, eses turróns e lambonadas, esas enchentas de Nadal… continúan a pesar nos vosos corpos. Os carnavais, as filloas, a cachucha, o cocido e os untos non se pode dicir que axuden moito, e por riba non vai moi bo tempo; chove, fai frío e cando un sae de estudar ou traballar aínda é de noite e só apetecen sofá, manta e televisión. Estamos rematando xa febreiro e, sendo así, todo o ano teredes escusas.
En Pratos Combinados sabemos que, dun xeito ou doutro, en 2015 estreas mixelín; xa que logo, ímosche axudar a queimalo con boa música. Pedímoslle a dous dos nosos amigos de Pincha(e)Discos -Lawrence King e Dj Son- que nos cociñaran un par de sesións de temas que resumiran as súas particulares visións da tempada que acaba de rematar, e aquí volas presentamos, listas para degustar como máis vos apeteza.
Por unha banda, Lawrence King ofrécenos unha ración de pezas house e dance con mesturas longas e elegantes a dous e tres pratos, con ingredientes do noso continente e un sabor xenuinamente americano; perfecta para os amantes do fitness e o exercicio lixeiro. Nela inclúense temas de Dirty Vegas, Storm Queen, Bob Sinclar, Manglar ou The Aston Shuffle. Podes escoitala premendo na seguinte imaxe:
Por outra banda, Dj Son seleccionou unha manchea de temas dance e EDM moi rítmicos, mesturados cunha base continua e sazonados con efectos acó e aló. O seu magnífico traballo, ideal para facer running, inclúe temas de Global Deejays, Kate Ryan, Inna, Calvin Harris ou Peter Gelderblom. Escóitaa premendo na seguinte imaxe:
En definitiva, dúas sesións con diferentes sabores e diferentes ritmos; para escoitar ou para bailar, para quencer con suavidade ou para facer exercicio a tope. Mesmo podedes facer coma min: enganchar unha noutra para chegar ao mes que ven con máis fibra que Coronado. E vós, sodes máis de fitness ou de running?
Por Sete Polgadas
The post ESTREAS MIX(e)LÍN appeared first on Pincha(e)Discos.